
قومی ادارہ صحت نے پاکستان میں نیپا وائرس کے پھیلاو کا خطرہ ظاہر کرتے ہوئے وارننگ جاری کردی۔بیماری کی علامات بتاتے ہوئے این آئی ایچ نے احتیاطی تدابیر اختیار کرنے ہدایت جاری کی ہیں۔
قومی ادارہ صحت نے ملک میں نیپا وائرس کے پھیلاؤ کا خدشہ ظاہرکرتے ہوئے وفاقی اور صوبائی ہیلتھ اتھارٹیوں کو نیپا وائرس کا انتباہی مراسلہ ارسال کردیا۔ ائیرپورٹ اور سرحدی مقامات پر مؤثرسرویلینس یقینی بنانے کی ہدایت کردی گئی۔
این آئی ایچ کے مطابق بھارتی سرحدی علاقوں میں موجود چمگادڑ سے نیپا وائرس پاکستان منتقل ہوسکتا ہے، متاثرہ چمگادڑ کے کھائے پھل سے نیپا وائرس انسان میں منتقل ہوسکتا ہے۔ وائرس متاثرہ چمگادڑ اور سور سے انسان میں منتقل ہوتا ہے۔
قومی ادارہ صحت کا کہنا ہےکہ نیپا وائرس کے علاج کے لیے اینٹی وائرل یا ویکسین دستیاب نہیں ہے۔وائرس کی علامات 5 تا 14 دن تک رہ سکتی ہیں،سر درد، بخار اور سانس لینے میں دشواری نیپا وائرس کی علامات ہیں، جی متلانا، قے، پٹھوں میں درد اور غنودگی بھی نیپا وائرس کی علامات ہیں۔