متحدہ عرب امارات

جی ٹی اے 6 کی متحدہ عرب امارات میں ریلیز کی تاریخ اور وقت کا اعلان، قیمت 299 درہم سے شروع، پری آرڈر اور ڈاؤن لوڈ کی تفصیلات بھی سامنے آگئیں

خلیج اردو
دنیا بھر کے گیمرز کا 13 سالہ انتظار ختم ہونے کے قریب ہے، مشہور ویڈیو گیم گرینڈ تھیفٹ آٹو 6 (جی ٹی اے 6) متحدہ عرب امارات میں جمعرات 19 نومبر کو دستیاب ہوگی۔ متحدہ عرب امارات کے معیاری وقت کے مطابق گیم رات 12 بجے اَن لاک ہوجائے گی، جس کے بعد کھلاڑی نئی ورچوئل دنیا وائس سٹی میں اپنا سفر شروع کرسکیں گے۔

جی ٹی اے 6 کی مقبولیت کا اندازہ اس بات سے لگایا جاسکتا ہے کہ دسمبر 2023 میں اس کے پہلے ٹریلر کا شائقین کو بے صبری سے انتظار تھا۔ ٹریلر ایک روز قبل لیک ہونے کے باوجود باضابطہ طور پر جاری ہونے کے بعد صرف دو دن میں 11 کروڑ 80 لاکھ سے زائد مرتبہ دیکھا گیا۔ راک اسٹار گیمز نے 2013 میں جی ٹی اے 5 ریلیز کی تھی، جس کے بعد نئی قسط کے لیے شائقین کو 13 سال انتظار کرنا پڑا۔

متحدہ عرب امارات کے پلے اسٹیشن اسٹور پر جی ٹی اے 6 کے اسٹینڈرڈ ایڈیشن کی قیمت 299.16 درہم جبکہ الٹیمیٹ ایڈیشن کی قیمت 373.96 درہم درج کی گئی ہے۔ یہ قیمتیں پلے اسٹیشن اسٹور کے مطابق ہیں، ایکس باکس اور مقامی ریٹیلرز کے ہاں قیمتوں میں فرق ہوسکتا ہے۔

اسٹینڈرڈ ایڈیشن میں مکمل گیم شامل ہوگی، جبکہ الٹیمیٹ ایڈیشن میں مرکزی کرداروں جیسن اور لوشیا کی کہانی سے متعلق خصوصی ڈیجیٹل مواد بھی فراہم کیا جائے گا۔ اس میں 1995 کی مشہور گروٹی چیتا اسپورٹس کار، شِتزو اسکوالو کشتی، خصوصی ہتھیار، ملبوسات، ٹیٹوز، گیراج اپ گریڈز، گاڑیوں میں تبدیلی کی سہولیات اور متعدد اضافی مشنز شامل ہیں۔

گیم ڈاؤن لوڈ کرنے کے لیے بھی خاصی اسٹوریج درکار ہوگی۔ پلے اسٹیشن کی سفارش کے مطابق پی ایس 5 یا ایکس باکس سیریز ایکس اور ایس میں کم از کم 212 جی بی خالی جگہ ہونی چاہیے۔ تاہم مختلف پلیٹ فارمز پر اسٹوریج کی ضرورت مختلف ہوسکتی ہے اور آئندہ اپ ڈیٹس کے ساتھ اس میں تبدیلی بھی ممکن ہے۔

متحدہ عرب امارات میں ڈیجیٹل پری آرڈر پلے اسٹیشن اسٹور اور ایکس باکس کے مائیکروسافٹ اسٹور سے دستیاب ہیں۔ گیم کے فزیکل ایڈیشن بھی ریلیز کے قریب ورجن میگاسٹور، جمبو الیکٹرونکس، گیکی اور ایمیزون یو اے ای جیسے بڑے ریٹیلرز کے ذریعے دستیاب ہونے کی توقع ہے۔

پری آرڈر کرنے والے صارفین کے لیے گیم کی پیشگی ڈاؤن لوڈنگ کا عمل 10 نومبر سے شروع ہوچکا ہے، تاکہ کھلاڑی ریلیز سے پہلے ہی اسے اپنے کنسول میں انسٹال کرسکیں۔ پی ایس 5 پر مقامی وقت کے مطابق رات 12 بجے ڈاؤن لوڈ دستیاب ہوا، جبکہ ایکس باکس پر عالمی سطح پر 10 نومبر کو رات 12 بجے جی ایم ٹی، یعنی متحدہ عرب امارات کے وقت کے مطابق صبح 4 بجے، پری لوڈنگ شروع ہوئی۔ جن صارفین نے پہلے ہی گیم خرید لی ہے، انہیں اپنے کنسول کی لائبریری میں ڈاؤن لوڈ کی دستیابی چیک کرنے کا مشورہ دیا گیا ہے۔ تاہم پیشگی ڈاؤن لوڈ کرنے سے گیم کو 19 نومبر سے پہلے کھیلنا ممکن نہیں ہوگا۔

گیم کے فزیکل اسٹینڈرڈ ایڈیشن کے خریداروں کو ایک اہم بات ذہن میں رکھنی ہوگی۔ اس کے ڈبے میں روایتی گیم ڈسک موجود نہیں ہوگی بلکہ یہ کوڈ اِن باکس ریلیز ہے، جس میں ڈیجیٹل ڈاؤن لوڈ کوڈ فراہم کیا جائے گا۔ خریدار اس کوڈ کو اپنے کنسول اکاؤنٹ پر استعمال کرکے گیم ڈاؤن لوڈ کرسکیں گے۔

راک اسٹار نے خریداروں کو یہ بھی ہدایت کی ہے کہ ڈاؤن لوڈ کوڈ خریدنے سے پہلے اس کا ریجن اپنے کنسول اکاؤنٹ کے ساتھ مطابقت رکھنے کی تصدیق کریں۔ خصوصاً وہ صارفین جن کا پلے اسٹیشن اکاؤنٹ متحدہ عرب امارات کے بجائے کسی دوسرے ملک میں رجسٹرڈ ہے، انہیں اپنے اکاؤنٹ کے اسی ملک یا ریجن کے ریٹیلر سے خریداری کرنے کا مشورہ دیا گیا ہے تاکہ ایکٹیویشن میں مشکلات پیش نہ آئیں۔

جی ٹی اے 6 ابتدائی طور پر صرف پلے اسٹیشن 5 اور ایکس باکس سیریز ایکس اور ایس کے لیے دستیاب ہوگی۔ راک اسٹار نے 19 نومبر کی ریلیز کے لیے پی سی ورژن کا اعلان نہیں کیا۔ گیمرز کو غیرسرکاری ویب سائٹس سے گیم ڈاؤن لوڈ کرنے سے بھی خبردار کیا گیا ہے۔ نیٹ کرافٹ کے محققین نے ایسی جعلی ویب سائٹس میں اضافے کی نشاندہی کی ہے جو گیم کے ابتدائی ایکسس، ڈاؤن لوڈ یا بیٹا ورژن فراہم کرنے کا دعویٰ کرتی ہیں۔ ان میں سے کئی ویب سائٹس میل ویئر پھیلانے، صارفین کی لاگ اِن معلومات چرانے یا اشتہارات کے ذریعے آمدنی حاصل کرنے کے لیے بنائی گئی ہیں۔

پری آرڈر کرنے والے صارفین کو دونوں ایڈیشنز کے ساتھ خصوصی ونٹیج وائس سٹی پیک بھی ملے گا۔ اس بونس میں جیسن اور لوشیا کے لیے خصوصی ملبوسات، 1955 کی ویپڈ اسٹینیئر گاڑی اور وائس سٹی کے نیون انداز سے متاثر ٹراپیکل پیٹرن ویپن اسکن شامل ہے۔

متعلقہ مضامین / خبریں

Back to top button