خلیج اردو
دبئی: سوشل میڈیا پر حالیہ دنوں میں یہ خبر زوروں پر رہی کہ آئندہ ماہ 2 اگست کو دنیا بھر میں ایک غیرمعمولی سورج گرہن دیکھا جائے گا، تاہم ماہرین فلکیات نے واضح کیا ہے کہ یہ اطلاع درست ضرور ہے مگر مکمل حقیقت سے ہٹ کر ہے۔ درحقیقت، صدی کا یہ طویل ترین سورج گرہن اگلے ماہ نہیں بلکہ 2 اگست 2027 کو ہوگا۔
دبئی فلکیاتی گروپ (DAG) کی آپریشنز منیجر خدیجہ الحریری کے مطابق یہ سورج گرہن 6 منٹ 23 سیکنڈ تک مکمل سورج کو ڈھانپے گا، جو 1991 کے بعد سب سے طویل ہو گا اور 2114 تک اس کا کوئی ثانی نہیں ہو گا۔
تاہم یہ بات ذہن نشین رہے کہ اگرچہ یہ سورج گرہن مکمل ہوگا، لیکن متحدہ عرب امارات سمیت کئی ممالک میں صرف جزوی گرہن ہی دیکھا جا سکے گا۔ ان میں عمان، اردن، عراق اور بھارت کے کچھ علاقے شامل ہیں۔
خدیجہ کے مطابق دبئی میں چاند سورج کا تقریباً 53 فیصد حصہ ڈھانپے گا، جس کے باعث سورج ہلال کی شکل اختیار کرے گا۔ دیگر امارات میں یہ تناسب 50 سے 57 فیصد کے درمیان رہے گا۔
دبئی فلکیاتی گروپ کے مطابق مکمل سورج گرہن کی راہ جنوبی اسپین، مراکش، الجزائر، تیونس، لیبیا، مصر، جنوبی سعودی عرب اور یمن سے گزرے گی، جہاں سورج مکمل طور پر چھپ جائے گا اور سورج کا ہالہ (کورونا) واضح طور پر نظر آئے گا۔
یہ سورج گرہن اس لیے بھی خاص ہے کہ یہ نہ صرف صدی کا طویل ترین ہوگا بلکہ مشرق وسطیٰ کے کئی شہروں میں نظر آئے گا، جو اسے لاکھوں لوگوں کے لیے ایک نایاب نظارہ بناتا ہے۔
خدیجہ الحریری کے مطابق، متحدہ عرب امارات سے آخری بار 25 اکتوبر 2022 کو جزوی سورج گرہن دیکھا گیا تھا جبکہ اگلا جزوی گرہن 1 جون 2030 کو ہوگا۔ ملک میں مکمل سورج گرہن دیکھنے کے لیے شہریوں کو 3 ستمبر 2081 تک کا انتظار کرنا ہوگا۔ اس کے علاوہ 7 ستمبر 2025 کو ایک شاندار مکمل چاند گرہن بھی دیکھا جا سکے گا۔
ماہرین کا کہنا ہے کہ اگرچہ ہر سال دنیا بھر میں 2 سے 5 سورج گرہن ہوتے ہیں، لیکن مکمل گرہن نہایت نایاب ہوتے ہیں اور ان میں دہائیوں بلکہ صدیوں کا وقفہ ہوتا ہے۔
احتیاطی تدابیر
ماہرین فلکیات نے خبردار کیا ہے کہ سورج گرہن کو براہ راست دیکھنے سے آنکھوں کو مستقل نقصان پہنچ سکتا ہے۔ دبئی فلکیاتی گروپ نے درج ذیل احتیاطی تدابیر جاری کی ہیں:
-
ISO 12312-2 معیاری چشمے استعمال کیے جائیں، عام دھوپ کے چشمے محفوظ نہیں ہوتے۔
-
دوربین، کیمرے یا ٹیلی سکوپ استعمال کرنے کی صورت میں ان پر مخصوص شمسی فلٹر لگائیں۔
-
سورج کو بالواسطہ دیکھنے کے لیے پن ہول پروجیکٹر یا سولر پروجیکشن طریقے استعمال کیے جائیں۔
براہ راست نشریات اور عوامی مشاہدہ
دبئی فلکیاتی گروپ کی جانب سے متحدہ عرب امارات میں ایک عوامی مشاہداتی تقریب کا انعقاد کیا جائے گا جس میں شمسی دوربینوں، ماہرین کی رہنمائی اور تعلیمی سرگرمیوں کے ذریعے شہری اس فلکیاتی منظر کا محفوظ انداز میں مشاہدہ کر سکیں گے۔ وہ افراد جو موقع پر موجود نہیں ہو سکتے، DAG کی براہ راست نشریات کے ذریعے اسے دنیا بھر سے دیکھ سکیں گے۔
