خلیج اردو
ابوظہبی: یو اے ای کے فٹبال شائقین جون اور جولائی 2026 میں امریکہ میں ہونے والے فیفا ورلڈ کپ کے لیے سفر کی تیاری کر رہے ہیں، ایسے میں امریکی سفارتخانے نے ویزا درخواست کے عمل میں تاخیر یا آخری وقت کے مسائل سے بچنے کے لیے اہم ہدایات جاری کر دی ہیں۔
امریکی سفارتخانے نے ویزا درخواست دہندگان پر زور دیا ہے کہ وہ فارم بھرنے میں درستگی اور مکمل دستاویزات پر خصوصی توجہ دیں، کیونکہ امریکی ویزا فارم میں معمولی غلطیاں بھی تاخیر کی بڑی وجہ بنتی ہیں۔ سفارتخانے کے ترجمان کے مطابق یو اے ای کے رہائشیوں کو چاہیے کہ ویزا کی شرائط کا بغور جائزہ لیں، تمام فارم درست انداز میں مکمل کریں اور ضروری دستاویزات پہلے سے تیار رکھیں تاکہ کسی بھی تاخیر سے بچا جا سکے۔
یہ ہدایات ان خاندانوں پر بھی لاگو ہوتی ہیں جو بچوں کے ہمراہ سفر کا ارادہ رکھتے ہیں، کیونکہ بچوں کے لیے اضافی کاغذی کارروائی اور منصوبہ بندی درکار ہوتی ہے۔
امریکی سفارتخانے نے وضاحت کی ہے کہ آئندہ فیفا پرائرٹی اپائنٹمنٹ شیڈولنگ سسٹم کے تحت ٹکٹ ہولڈرز کو ویزا انٹرویو کے لیے ترجیحی وقت فراہم کیا جائے گا، تاہم ویزا جانچ پڑتال کے معیارات میں کوئی نرمی نہیں کی جائے گی۔ ترجیحی نظام استعمال کرنے والے درخواست دہندگان کو بھی تمام شرائط پوری کرنا ہوں گی، جن میں واضح سفری منصوبہ اور مالی استطاعت کا ثبوت شامل ہے۔
سفارتخانے کے مطابق اس نئے نظام کی کئی تفصیلات ابھی حتمی مراحل میں ہیں اور جلد عوام کے سامنے لائی جائیں گی۔ اس وقت یہ واضح نہیں کہ پہلے سے طویل تاریخ کی اپائنٹمنٹ رکھنے والے افراد ترجیحی سلاٹس میں منتقل ہو سکیں گے یا نہیں، فیفا ٹکٹس کی تصدیق کیسے کی جائے گی، ترجیحی اپائنٹمنٹس کی تعداد کتنی ہوگی، اور آیا خاندانوں کو مشترکہ یا منسلک انٹرویو اپائنٹمنٹس مل سکیں گی یا نہیں۔
امریکی حکام کا کہنا ہے کہ امریکی محکمہ خارجہ ایسا نظام تیار کر رہا ہے جس کے تحت تمام فیفا ورلڈ کپ ٹکٹ ہولڈرز، جنہیں ویزا درکار ہے، ٹورنامنٹ سے قبل انٹرویو مکمل کر سکیں گے۔
فی الحال امریکی سفارتخانے نے یو اے ای کے رہائشیوں کو ہدایت کی ہے کہ مزید اعلانات کا انتظار کیے بغیر تیاری شروع کریں، سرکاری ہدایات پر عمل کریں، دستاویزات بروقت مکمل کریں اور 2026 کے آغاز میں متوقع اپ ڈیٹس پر نظر رکھیں، جب فیفا پاس سے متعلق مکمل رہنما اصول جاری کیے جائیں گے۔
