خلیج اردو
ٹیکنالوجی کمپنی ایپل کی جانب سے آئندہ آئی فون سیریز کی لانچ حکمت عملی سے متعلق اہم تفصیلات سامنے آ گئی ہیں، جن کے مطابق آئی فون 18 پرو ماڈلز کے ساتھ کمپنی کا پہلا فولڈ ایبل آئی فون بھی متعارف کرایا جا سکتا ہے۔
رپورٹس کے مطابق فولڈ ایبل آئی فون کی ڈسپلے پروڈکشن جولائی میں بڑے پیمانے پر شروع ہونے کا امکان ہے، جو آئی فون 18 پرو اور آئی فون 18 پرو میکس کی ڈسپلے تیاری کے شیڈول سے مطابقت رکھتی ہے۔
ایپل کے روایتی پروڈکٹ سائیکل کے مطابق جولائی میں بڑے پیمانے پر پروڈکشن کا آغاز عام طور پر ستمبر میں لانچ کی راہ ہموار کرتا ہے، جس سے عندیہ ملتا ہے کہ کمپنی اپنا پہلا فولڈ ایبل فلیگ شپ اسی ایونٹ میں پیش کر سکتی ہے۔
فولڈ ایبل آئی فون کی ڈسپلے ٹیکنالوجی کیلئے ایپل مبینہ طور پر سام سنگ پر انحصار کرے گی، جبکہ ایل جی ڈسپلے کو اس منصوبے سے باہر رکھا گیا ہے۔
واضح رہے کہ فولڈ ایبل اسکرینز اسمارٹ فون انڈسٹری کے پیچیدہ ترین اجزاء میں شمار ہوتی ہیں، جن میں اسکرین کی مضبوطی، شکن کنٹرول اور ہنج انجینئرنگ جیسے چیلنجز شامل ہیں۔
تاہم کمپنی نے تاحال ان خبروں کی باضابطہ تصدیق نہیں کی ہے، جس کے باعث اس متوقع لانچ کے حوالے سے حتمی اعلان کا انتظار کیا جا رہا ہے۔
تجزیہ کاروں کے مطابق اگر یہ منصوبہ کامیاب رہا تو ایپل پہلی بار فولڈ ایبل اسمارٹ فون مارکیٹ میں باضابطہ طور پر داخل ہو جائے گی۔
