خلیج اردو
اسپائیڈر مین فلم سیریز میں نیڈ لیڈز کا کردار ادا کرنے والے اداکار جیکب بیٹالون نے اپنی دیرینہ ساتھی ورونیکا لیہوف سے شادی کرلی ہے۔ جوڑے کی منگنی کے اعلان کے ایک سال سے زائد عرصے بعد ان کی شادی کی خبر سامنے آئی ہے۔
جیکب بیٹالون نے Spider-Man: Brand New Day کی تشہیر کے سلسلے میں ایک حالیہ انٹرویو کے دوران بظاہر اپنی شادی کی تصدیق کی۔ اداکار نے ورونیکا لیہوف کا ذکر کرتے ہوئے انہیں "میری بیوی” کہا۔ ان کا یہ مختصر تبصرہ مداحوں کی توجہ کا مرکز بن گیا اور اسے جوڑے کی خاموشی سے ہونے والی شادی کی پہلی عوامی تصدیق قرار دیا گیا۔
شادی کی ایک اور علامت اس وقت سامنے آئی جب جیکب بیٹالون کو Spider-Man: Brand New Day کے لاس اینجلس پریمیئر میں شادی کی انگوٹھی پہنے دیکھا گیا۔ انگوٹھی کی تصاویر سامنے آنے کے بعد قیاس آرائیاں مزید مضبوط ہوگئیں کہ دونوں نے شادی کرلی ہے۔
اسی دوران ورونیکا لیہوف نے اپنی پروفیشنل ویب سائٹ پر اپنا خاندانی نام تبدیل کرکے بیٹالون کرلیا جسے شادی کی مزید تصدیق کے طور پر دیکھا گیا۔
تاہم جیکب بیٹالون اور ورونیکا لیہوف نے اب تک اپنی شادی کا باضابطہ اعلان نہیں کیا اور نہ ہی یہ بتایا ہے کہ شادی کب یا کہاں ہوئی۔
ورونیکا لیہوف کا تعلق مالدووا سے ہے اور وہ نیویارک میں انٹیریئر ڈیزائنر کے طور پر کام کرتی ہیں۔ اگرچہ وہ کئی برس سے مارول کے معروف اداکار کے ساتھ تعلق میں ہیں تاہم وہ زیادہ تر میڈیا کی توجہ سے دور رہی ہیں۔ دونوں نے اپنے تعلق کو بھی نجی رکھا ہے اور کبھی کبھار ہی ایک ساتھ عوامی سطح پر نظر آئے ہیں۔
یہ شادی جیکب بیٹالون کی جانب سے مارچ 2025 میں نیویارک سٹی میں ورونیکا لیہوف کو شادی کی پیشکش کے ایک سال سے زائد عرصے بعد سامنے آئی ہے۔
بیٹالون نے منگنی کا اعلان انسٹاگرام پر موم بتیوں سے سجے نیویارک کے پروپوزل کی تصاویر کے ساتھ کیا تھا اور لکھا تھا کہ یہ "ہماری باقی زندگی کا آغاز” ہے۔ ورونیکا نے اس لمحے کو اپنی زندگی کی "خالص ترین خوشی” قرار دیا تھا۔
منگنی کے اعلان کے کچھ عرصے بعد دونوں Novocaine کے پریمیئر میں ایک ساتھ نظر آئے تھے جس میں بیٹالون نے معاون کردار ادا کیا تھا۔
اپنے تعلق کو نجی رکھنے کے حوالے سے اس جوڑے کا انداز اسپائیڈر مین کے ساتھی اداکار ٹام ہالینڈ اور زیندا یا سے بھی ملتا جلتا ہے جو اپنی منگنی اور شادی کے حوالے سے زیادہ تر خاموش رہے ہیں۔
جیکب بیٹالون بعد میں یہ بھی بتا چکے ہیں کہ نہ انہیں اور نہ ہی ٹام ہالینڈ کو علم تھا کہ دوسرا اپنی ساتھی کو شادی کی پیشکش کرنے والا ہے۔ اس بیان نے ان قیاس آرائیوں کا خاتمہ کردیا تھا کہ دونوں اسپائیڈر مین جوڑوں نے اپنی منگنیوں کی منصوبہ بندی مل کر کی تھی۔
