خلیج اردو
ابوظبی کے مصفح علاقے میں رہائشیوں اور آنے والوں کے لیے جلد عوامی پارکنگ پر فیس لاگو کر دی جائے گی، جہاں ٹریفک دباؤ کم کرنے اور روانی بہتر بنانے کے لیے نیا بامعاوضہ پارکنگ سسٹم متعارف کرایا جا رہا ہے۔ کیو موبیلیٹی کے مطابق مصفح میں بامعاوضہ پارکنگ کے پہلے مرحلے کا آغاز 12 جنوری سے کیا جائے گا، جو امارات کے مصروف ترین صنعتی علاقوں میں سے ایک ہے۔
اس مرحلے کے تحت سیکٹر ایم ون، ایم ٹو، ایم تھری، ایم فور اور ایم چوبیس میں بامعاوضہ پارکنگ نافذ کی جائے گی، جس میں مجموعی طور پر 4 ہزار 680 پارکنگ اسپیسز شامل ہوں گی، جبکہ معذور افراد کے لیے مخصوص پارکنگ مقامات بھی مختص کیے گئے ہیں۔ پارکنگ فیس دو درہم فی گھنٹہ مقرر کی گئی ہے، جس کی ادائیگی درب اور تم ایپلی کیشنز، ایس ایم ایس اور موقع پر نصب ادائیگی مشینوں کے ذریعے کی جا سکے گی۔
یہ نظام عوامی پارکنگ کے بہتر انتظام، سڑک استعمال کرنے والوں کے تجربے میں بہتری اور صنعتی و تجارتی سرگرمیوں کی معاونت کے لیے ایک جامع منصوبے کا حصہ ہے، تاکہ ملازمین اور آنے والوں کو سہولت کے ساتھ رسائی حاصل ہو سکے۔
حکام کے مطابق مصفح میں ٹریفک کی زیادہ تعداد، مختلف معاشی سرگرمیوں اور روزانہ بڑی تعداد میں ملازمین و زائرین کی آمد و رفت کے باعث پارکنگ کے مسائل پیدا ہو رہے تھے، جن میں پارکنگ کی دستیابی میں دشواری اور بے ترتیبی شامل ہے۔ بامعاوضہ پارکنگ کے نفاذ کا مقصد ان مسائل کا حل نکالنا، گاڑیوں کی روانی بہتر بنانا، سڑکوں کی حفاظت میں اضافہ کرنا اور کام کے ماحول کو زیادہ منظم بنانا ہے۔
واضح رہے کہ نومبر 2025 میں ابوظبی کے الشہامہ علاقے میں بھی بامعاوضہ پارکنگ نافذ کی گئی تھی، جہاں 3 ہزار 704 پارکنگ اسپیسز پر دو درہم فی گھنٹہ فیس مقرر کی گئی۔ اسی طرح دسمبر 2025 کے وسط میں محمد بن زاید سٹی کے تجارتی علاقوں میں پارکنگ قوانین نافذ کیے گئے، جبکہ جولائی 2025 میں ایسٹرن مینگرووز، ڈولفن پارک اور الخلیج العربی اسٹریٹ سمیت دیگر اہم مقامات پر بھی بامعاوضہ پارکنگ کا دائرہ کار بڑھایا گیا تھا۔
