خلیج اردو
امریکی صدر ڈونلڈ ٹرمپ نے تصدیق کی ہے کہ انہوں نے فیفا کے صدر جیانی انفانٹینو سے امریکی اسٹرائیکر فولرین بالوگن کو دکھائے گئے ریڈ کارڈ پر نظرثانی کی درخواست کی تھی۔ ان کا کہنا تھا کہ ریفری کا فیصلہ منصفانہ نہیں تھا۔
اوول آفس میں صحافیوں سے گفتگو کرتے ہوئے ڈونلڈ ٹرمپ نے کہا، "میں نے صرف نظرثانی کی درخواست کی کیونکہ میرے خیال میں یہ فاؤل نہیں تھا۔”
ٹرمپ نے کہا کہ انہوں نے واقعہ دیکھا تھا اور ان کے مطابق یہ صرف دو کھلاڑیوں کے تیز رفتاری سے دوڑتے ہوئے ایک دوسرے سے ٹکرا جانے کا معاملہ تھا۔
انہوں نے کہا، "یہ نہ فاؤل تھا اور نہ ہی کوئی خلاف ورزی۔ ریفری کا فیصلہ انتہائی خراب تھا۔”
ٹرمپ نے مزید کہا کہ انہوں نے فیفا کو کوئی حکم نہیں دیا بلکہ صرف نظرثانی کی درخواست کی، کیونکہ وہ چاہتے تھے کہ امریکی ٹیم اپنے بہترین کھلاڑیوں کے ساتھ میدان میں اترے۔
دوسری جانب فیفا کے صدر جیانی انفانٹینو نے کہا کہ انہیں اس معاملے پر صدر ٹرمپ کی فون کال موصول ہوئی تھی، تاہم انہوں نے واضح کیا کہ فیفا کا تادیبی نظام مکمل طور پر خودمختار ہے اور تمام فیصلے آزاد عدالتی ادارے کرتے ہیں۔
انفانٹینو نے اپنے بیان میں کہا، "میں نے صدر ٹرمپ کو بتایا کہ معاملہ فیفا کے آزاد عدالتی اداروں کے پاس زیرِ غور ہے اور فیصلہ متعلقہ ادارے اپنے ضابطوں کے مطابق کریں گے۔”
انہوں نے مزید کہا کہ انہیں دنیا بھر کے سربراہانِ مملکت، حکومتی عہدیداروں اور فٹبال سے وابستہ شخصیات کی جانب سے مختلف معاملات پر فون کالز موصول ہوتی رہتی ہیں، لیکن وہ ہمیشہ فیفا کے آزاد اداروں کے فیصلوں کا احترام کرتے ہیں۔
ٹرمپ کی جانب سے اس معاملے میں مداخلت کے بعد فیفا کے تادیبی نظام پر عالمی سطح پر بحث شروع ہو گئی ہے، جبکہ بیلجیم کی جانب سے بھی اس فیصلے پر شدید ردعمل سامنے آیا ہے۔
