خلیج اردو
ابوظہبی:متحدہ عرب امارات سے تعلق رکھنے والے معروف ڈاکٹر اور فلاحی شخصیت ڈاکٹر شمشیر ویالیل نے ایئر انڈیا فلائٹ 171 کے المناک حادثے میں جاں بحق میڈیکل طلبہ اور ڈاکٹروں کے اہل خانہ کی مالی معاونت کے لیے 25 لاکھ درہم (تقریباً 76 کروڑ پاکستانی روپے) کے امدادی پیکیج کا اعلان کر دیا ہے۔
ڈاکٹر شمشیر ویالیل، جو برجل ہولڈنگز کے بانی اور VPS ہیلتھ کے مینجنگ ڈائریکٹر ہیں، نے بتایا کہ یہ فیصلہ ان کی ذاتی زندگی اور میڈیکل کمیونٹی سے وابستگی کے تجربات سے جڑا ہوا ہے۔ ان کا کہنا تھا، "میں خود بھی میڈیکل ہاسٹل میں رہ چکا ہوں، اس لیے یہ حادثہ میرے دل کو چھو گیا۔”
یہ افسوسناک واقعہ 12 جون کو پیش آیا، جب ایئر انڈیا کی بوئنگ 787 طیارہ احمد آباد میں بی جے میڈیکل کالج کے ہاسٹل اور میس بلاک پر جا گرا، جس کے نتیجے میں چار میڈیکل طلبہ اور ڈاکٹروں کے پانچ اہل خانہ جاں بحق جبکہ درجنوں زخمی ہو گئے۔ حادثے کے وقت طلبہ دوپہر کے کھانے میں مصروف تھے جب طیارہ آتُلیَم ہاسٹل کمپلیکس سے ٹکرا گیا۔
جاں بحق طلبہ کے نام
جاں بحق ہونے والے چار نوجوان طلبہ میں جے پرکاش چوہدری (بارمیر، راجستھان)، مناو بھادو (شری گنگانگر، راجستھان)، آریان راجپوت (گوالیار، مدھیہ پردیش)، اور راکیش دیورہ (بھاونگر، گجرات) شامل ہیں۔ یہ سب اپنے میڈیکل کیریئر کے ابتدائی مراحل میں تھے۔
امداد کی تفصیل
ڈاکٹر ویالیل نے بتایا کہ وہ ہر جاں بحق طالب علم کے خاندان کو 4 لاکھ 26 ہزار درہم (تقریباً ایک کروڑ بھارتی روپے)، پانچ شدید زخمی طلبہ کو 85 ہزار درہم، اور اُن ڈاکٹروں کے خاندانوں کو بھی 85 ہزار درہم دیں گے جن کے عزیز اس حادثے میں جان کی بازی ہار گئے۔ یہ امداد بی جے میڈیکل کالج کی جونیئر ڈاکٹروں کی تنظیم کے ذریعے تقسیم کی جائے گی تاکہ یہ فوری طور پر مستحقین تک پہنچ سکے۔
ذاتی درد اور وابستگی
انہوں نے کہا، "جب میں نے ہاسٹل اور میس کی تباہی کی فوٹیج دیکھی تو ایسا لگا جیسے وہ جگہیں میری اپنی ہوں۔ وہ راہداریاں، وہ بیڈز، وہ ہنسی، امتحان کا دباؤ اور گھر والوں کے فون کا انتظار — سب کچھ یاد آ گیا۔ کسی کو یہ توقع نہیں ہوتی کہ ایک طیارہ اچانک آ کر اس سب کو مٹی کا ڈھیر بنا دے گا۔”
محض مالی امداد نہیں، یکجہتی کا اظہار
ڈاکٹر ویالیل نے کہا کہ یہ امداد صرف مالی مدد نہیں بلکہ میڈیکل برادری کی عالمی سطح پر یکجہتی اور ہم دردی کی علامت ہے۔ "یہ طلبہ انسانیت کی خدمت کیلئے تیار ہو رہے تھے، ان کے خواب ادھورے رہ گئے۔ ان خوابوں کو ہمیں اپنی اجتماعی ذمہ داری کے تحت پورا کرنا ہے۔”
تنظیم کی معاونت
جونیئر ڈاکٹروں کی تنظیم، جو عالمی میڈیکل ایسوسی ایشن کا حصہ ہے، متاثرہ خاندانوں اور طلبہ کی مدد کے لیے انتظامیہ سے مسلسل رابطے میں ہے، اور ڈاکٹر ویالیل کی ٹیم ان کے ساتھ مل کر یہ امداد جلد مستحقین تک پہنچائے گی۔
