یو اے ای: وِز ایئر ابوظہبی کے انخلاء کے بعد ہوائی سفر کے کرایوں میں اضافہ ہوگا؟ اتحاد ایئر ویز کے سی ای او کا جواب

خلیج اردو
اتحاد ایئر ویز کے چیف ایگزیکٹو افسر انتونوالدو نیویس نے کہا ہے کہ وِز ایئر ابوظہبی کے انخلاء کے بعد متحدہ عرب امارات میں ہوائی کرایوں کا تعین رسد، طلب اور مارکیٹ کے حالات پر ہوگا۔ انہوں نے کہا کہ "مارکیٹ ہی بادشاہ ہے، اس لیے اس سے فرق نہیں پڑتا کہ کون آ رہا ہے، کون جا رہا ہے یا کون گنجائش بڑھا رہا ہے۔ اصل سوال یہ ہے کہ مستقبل میں رسد اور طلب کی صورتحال کیا ہوگی؟ اگر طلب کم ہوئی تو کرایے بھی کم ہوں گے۔”

واضح رہے کہ وِز ایئر ابوظہبی نے اعلان کیا ہے کہ وہ یکم ستمبر 2025 سے اپنی پروازیں معطل کر دے گا اور اپنے مشترکہ منصوبے کو ختم کر دے گا۔ وِز ایئر کی کم قیمت پروازیں، جو 79 درہم سے شروع ہوتی تھیں، خاص طور پر مشرقی یورپ اور سی آئی ایس ممالک کے سیاحوں میں مقبول تھیں۔

ائرلائن نے انخلاء کی تین وجوہات بیان کیں: انجنوں کی کارکردگی کے مسائل جو خطے کے گرم موسم میں بڑھ گئے، جغرافیائی سیاسی عدم استحکام، اور ریگولیٹری چیلنجز۔ وِز ایئر اب اپنی توجہ وسطی اور مشرقی یورپ کے بنیادی مارکیٹس پر مرکوز کرے گا۔

2024 میں وِز ایئر ابوظہبی نے 19,000 سے زائد پروازیں کیں اور 4.4 ملین سے زیادہ سستے ٹکٹ فراہم کیے۔ ائرلائن نے 3.5 ملین سے زیادہ پوائنٹ ٹو پوائنٹ مسافروں کو سفر کرایا، جو زاید انٹرنیشنل ایئرپورٹ کی کل پوائنٹ ٹو پوائنٹ ٹریفک کا 25 فیصد بنتا ہے۔

ابوظہبی میں اس وقت تین بڑی ائرلائنز کام کر رہی ہیں: قومی ائرلائن اتحاد ایئر ویز، ایئر عربیہ ابوظہبی اور وِز ایئر ابوظہبی، جو ہر قسم کے مسافروں کو خدمات فراہم کرتی ہیں، خواہ وہ لگژری سفر کرنے والے ہوں یا بجٹ کا خیال رکھنے والے۔

نیویس نے کہا کہ "میں نہیں جانتا کہ آئندہ سال میں رسد اور طلب کیسا ردعمل دیں گے، کیونکہ یہ صرف اتحاد پر منحصر نہیں ہے بلکہ دیگر ائرلائنز بھی یو اے ای میں کام کر رہی ہیں۔”

اتحاد کے سی ای او نے یہ بات اس وقت کہی جب اتحاد ایئر ویز نے اپنے 30 ایئربس A321LR طیاروں میں سے پہلا طیارہ وصول کیا۔

ماہرین کا کہنا ہے کہ وِز ایئر کے انخلاء کے باوجود ہوائی سفر کے کرایوں میں زیادہ خلل نہیں آئے گا۔ لندن کی اسٹریٹجک ایرو ریسرچ کے چیف اینالسٹ ساج احمد نے کہا کہ "وِز ایئر کا ابوظہبی سے جانا کوئی خلا پیدا نہیں کرے گا۔ وِز ایئر نے ایسی مارکیٹ بنانے کی کوشش کی جو حقیقت میں موجود ہی نہیں تھی، جیسا کہ ایئر ایشیا ایکس کے ساتھ ہوا جو صرف چھ ماہ میں ابوظہبی سے نکل گئی۔”

نیویس نے اس تاثر کو بھی مسترد کیا کہ اتحاد ایئر ویز کرایوں میں مصنوعی اضافہ کر رہا ہے۔ انہوں نے کہا کہ "ہم کرایے طلب اور مسابقت کے مطابق طے کرتے ہیں۔ اگر طلب زیادہ ہو اور ہمارے پاس طیارے نہ ہوں تو کرایے بڑھتے ہیں، ورنہ کم ہو جاتے ہیں۔ یہ کہنا غلط ہے کہ اتحاد جان بوجھ کر کرایے بڑھا رہا ہے۔”

نیویس نے کہا کہ متحدہ عرب امارات کی فضائی مارکیٹ بہت وسیع ہے اور یہاں مختلف اقسام کی ائرلائنز کے لیے جگہ موجود ہے۔ انہوں نے کہا کہ "یو اے ای میں چار شاندار ائرلائنز ہیں — فلائی دبئی، ایمریٹس، اتحاد اور ایئر عربیہ۔ یہ سب منافع کما رہی ہیں۔ یہاں لگژری ائرلائنز کے لیے بھی جگہ ہے، درمیانی سطح کی ائرلائنز کے لیے بھی اور کم قیمت ائرلائنز کے لیے بھی۔ یو اے ای دنیا کی بہترین مارکیٹوں میں سے ایک ہے اور ہمیں اس پر فخر ہونا چاہیے۔