متحدہ عرب امارات میں گولڈن ویزہ کیسے حاصل کیا جا سکتا ہے ؟

ابوظبی، خلیج ارود : متحدہ عرب امارات نے مملکت امارت میں سرمایہ کاری میں اضافہ کی خاطر گزشتہ سال گولڈن ویزہ کے اجراء کو شروع کیا تھا۔ منفرد کاروباریوں کے لیے گولڈن ویزہ گولڈن ریزیڈنس سسٹم کا حصہ ہے۔ اس کی بدولت ہی افراد کو اقامہ دائمہ ملتا ہے- انہیں اور ان کے اہل خانہ کو غیر معمولی مراعات حاصل ہوتی ہیں- اچھوتے کاروبار میں نام رکھنے والا کوئی بھی انسان اس کے لیے درخواست دے سکتا ہے۔

گولڈن ویزہ حاصل کرنے کے لیے پانچ بنیادی شرائط پوری کرنا ضروری ہیں۔

• امیدوار کو ثابت کرنا ہوگا کہ وہ منفرد کاروباری ہونے کا تجربہ رکھتا ہے۔
• امیدوار پیش کردہ پروجیکٹ کا بڑا حصے دار ہو یا پروجیکٹ کی انتظامیہ کا رکن ہو۔
• امیدوار متحدہ عرب امارات میں رہن سہن کے لیے تیار ہو۔
• متحدہ عرب امارات کی کسی ایک ریاست میں تجارتی منصوبہ قائم کرنے کا ارادہ رکھتا ہو۔امیدوار امارات میں کوئی لائحہ عمل یا کسی منصوبے کا تصور پیش کررہا ہو۔
• امیدوار محکمہ شہریت و قومیت کے تقاضوں کو پورا کررہا ہو۔ اس حوالے سے اس کا صحت مند ہونا ضروری ہے۔امیدوار کے لیے ضروری ہے کہ وہ دبئی میں اے ائر ای اے 2071 یا ابوظبی میں ایچ او بی 71 سے اپنی نامزدگی کی منظوری حاصل کرے- اس منظوری کے بعد ہی اسے محکمہ شہریت و قومیت کی جانب سے ویزے کی درخواست پیش کرنے کے لیے دعوت نامہ جاری کیا جائے گا۔

گولڈن ریزیڈنس کی درخواست کے لیے ای پلیٹ فارم https://business.goldenvisa.ae کا رخ کیا جائے- امیدوار نیا اکاوٴنٹ قائم کرکے درخواست جمع کرے- درخواست پر نظرثانی 30 روز کے اندر ہوگی- درخواست منظور ہونے کی صورت میں امیدوار کو مطلوبہ دستاویزات اپلوڈ کرنے اور ویزے کے حصول کی درخواست دینے کے لیے لنک دیا جائے گا-منظوری نہ آنے کی صورت میں امیدوار 30 دن تک انتظار کرکے نئی درخواست پیش کرسکتا ہے-

منظوری کے بعد امیدوار درخواست مکمل کرے گا- یہ کام مکمل کرنے پر اسے ای میل کے ذریعے بتایا جائے گا کہ ویزہ حاصل کرنے کا طریقہ کار کیا ہوگا-ملٹی پل ویزہ چھ ماہ کے لیے جاری ہوگا- اس دوران امیدوار سرمایہ کار امارات میں اپنا پروجیکٹ شروع کرنے کے لیے صورت حال کا جائزہ لے گا- ویزے کی درخواست کی کارروائی مکمل کرے گا تاکہ عارضی ویزے کو اقامہ دائمہ میں تبدیل کرسکے- اگر امیدوار امارات میں مقیم ہوگا تو اسے ایک ماہ کا عارضی ویزہ دیا جائے گا اور اسے عارضی ویزے کو اقامہ دائمہ میں تبدیل کرنے کے لیے کہا جائے گا-یاد رہے کہ منفرد کاروبار کرنے والوں کو 5 برس کا قابل توسیع اقامہ ملے گا- اس کے لیے انہیں کسی اماراتی سپانسر کی ضرورت نہیں ہوگی- سرمایہ کار کی بیوی یا شوہر، اولاد اور تین ایگزیکٹیو ڈائریکٹرز کو بھی 5، 5 سال کا اقامہ جاری ہوگا ۔