خلیج اردو
شارجہ: سپریم کونسل کے رکن اور شارجہ کے حکمران شیخ ڈاکٹر سلطان بن محمد القاسمی نے خورفکان کی بلند ترین چوٹی تک پہاڑی سیاحتی روڈ کی تعمیر کا اعلان کر دیا۔ یہ منصوبہ 17 جولائی کو براہ راست نشریاتی پروگرام ‘ڈائریکٹ لائن’ میں گفتگو کے دوران سامنے آیا، جسے شارجہ براڈکاسٹنگ اتھارٹی نے نشر کیا۔
شیخ سلطان کے مطابق، یہ سڑک "ایسا عجوبہ ہوگی جو پہلے کبھی نہیں دیکھا گیا”۔ سڑک الغضیر ٹنل سے شروع ہو کر 1,100 میٹر کی بلندی پر واقع خورفکان کی سب سے اونچی پہاڑی چوٹی تک جائے گی۔ سڑک پہاڑی ڈھلوانوں اور چوٹیاں عبور کرے گی، جہاں اردگرد درخت، کھیت، پانی کی نہریں اور خوبصورت رہائشیں موجود ہوں گی، جو اسے سرد اور معتدل موسم میں ایک دلکش سیاحتی سفر میں بدل دیں گی۔
یہ سڑک صرف ایک شاہراہ نہیں بلکہ ایک مکمل سیاحتی راستہ ہوگی، جو علاقے کے مختلف دیہات کو بھی سہولیات فراہم کرے گی۔
جبل دیم میں نئے منصوبے
اس موقع پر شیخ سلطان نے کالبہ کے رہائشیوں کے لیے جبل دیم میں نئے منصوبوں کا اعلان بھی کیا، جن میں ایک آرام گاہ، کھیت، اور کھیل کے میدان شامل ہوں گے۔ یہ منصوبے مارچ 2026 میں عوام کے لیے کھولے جانے کی توقع ہے۔
