
خلیج اردو
اسلام آباد: وزیرداخلہ محسن نقوی نے پروٹیکٹیڈ صارفین کو اووربلنگ کی شکایات کا سخت نوٹس لے لیا۔ اووربلنگ کرنے والے افسروں اور عملے کے خلاف قانونی کارروائی کا حکم دیتے ہوئے کہا کہ 200 یونٹ استعمال کرنے والے صارفین کے ساتھ ہونے والی ناانصافی کا ازالہ کیا جائے۔
اووربلنگ کرنے والے افسروں اور عملہ اب بچ نہیں سکے گا۔ وزیر داخلہ محسن نقوی نے پروٹیکٹیڈ صارفین کی اوور بلنگ کی بڑھتی شکایات کا نوٹس لیتے ہوئے قانونی کارروائی کا حکم دے دیا۔
وزیر داخلہ نے ایف آئی اے کے تمام ڈائریکٹرز کو احکامات جاری کرتے ہوئے کہا کہ 200 یونٹ استعمال کرنے والے صارفین کے ساتھ ہونے والی ناانصافی کا ازالہ کیا جائے۔
انہوں نے کہا کہ پروٹیکٹیڈ صارفین کو جان بوجھ کر نان پروٹیکٹیڈ کیٹگری میں شامل کرنا مجرمانہ فعل ہے۔ جس کی قطعا اجازت نہیں دی جا سکتی۔ ایف آئی اے تمام صورتحال کا جائزہ لے اور حقائق کی روشنی میں بلا امتیاز ذمہ داروں کے خلاف ایکشن لے۔
محسن نقوی کا کہنا تھا کہ اوور بلنگ سے پروٹیکٹڈ کیٹگری تبدیل ہونے سے صارفین پر کروڑوں روپے کا اضافی بوجھ پڑا۔ ایسے صارفین پہلے ہی مشکلات کا شکار ہیں۔ اووربلنگ سے ان کی مشکلات مزید بڑھ گئی ہیں۔