پاکستان بھارت کے ساتھ ہتھیاروں کی دوڑ میں شامل نہیں، ڈی جی آئی ایس پی آر

خلیج اردو
اسلام آباد (اکتوبر 7) ڈی جی آئی ایس پی آر لیفٹیننٹ جنرل احمد شریف چودھری نے کہا ہے کہ پاکستان بھارت کے ساتھ ہتھیاروں کی دوڑ میں شامل نہیں۔ انہوں نے واضح کیا کہ پاکستان ہر قسم کی ٹیکنالوجی — چاہے وہ خود ساختہ ہو، مشرقی ہو یا مغربی — کے حصول کے لیے تیار رہتا ہے۔

غیر ملکی جریدے بلومبرگ کو دیے گئے انٹرویو میں لیفٹیننٹ جنرل احمد شریف چودھری نے کہا کہ پاکستان نے کبھی بھی اعداد و شمار یا حقائق سے کھیلنے یا انہیں چھپانے کی کوشش نہیں کی۔ انہوں نے کہا کہ معرکۂ حق میں ہندوستان پاکستان کا کوئی بھی طیارہ نہیں گرا سکا جبکہ ایک ہفتہ قبل امریکی صدر ڈونلڈ ٹرمپ نے 7 بھارتی طیارے مار گرائے جانے کی تصدیق کی تھی۔

ڈی جی آئی ایس پی آر نے کہا کہ پاکستان کی فوجی ترقیاتی حکمتِ عملی ہمیشہ مؤثر اور کارگر پلیٹ فارمز کے حصول اور ملکی ٹیکنالوجی کو شامل کرنے پر مرکوز رہی ہے۔ انہوں نے بتایا کہ پاکستان نے حال ہی میں زیڈ-10 ایم ای حملہ آور ہیلی کاپٹر کو اپنے ہتھیاروں میں شامل کرنے کا اعلان کیا ہے۔

ان کا مزید کہنا تھا کہ پاکستان چینی ہتھیاروں کے ساتھ ساتھ امریکی ساختہ ایف-16 طیاروں کا بھی استعمال کرتا ہے، اور ملکی دفاعی حکمتِ عملی میں توازن اور کارکردگی کو ہمیشہ اولین ترجیح دی جاتی ہے۔