فلسطینی سفیر کی جی ایچ کیو آمد ، آرمی چیف سےملاقات۔ آرمی چیف کا غزہ میں اسرئیلی دفاعی فوزسز کے ہاتھوں فلسطینی شہریوں کے جانی نقصان پر شدید اظہار تشویش

آرمی چیف جنرل سید عاصم منیر کی فلسطین میں بے گناہ شہریوں پر جاری وحشیانہ مظالم کی پرزور مذمت، عالمی برادری سے اسرائیلی فورسز کی بربریت اور شہری آبادی، اسکولوں، اسپتالوں اور امدادی کارکنوں پر حملے بند کرانے کیلئے کردار ادا کرنے کا مطالبہ، غزہ میں امداد پہنچانے کیلئے راہداری کھولنے کا بھی مطالبہ کردیا۔

آئی ایس پی آر کے مطابق آرمی چیف جنرل سید عاصم منیر نے پاکستان میں فلسطین کے سفیر احمد جواد ربیع سے ملاقات کی
اور غزہ میں جاری جنگ میں فلسطینیوں کی شہادت پر تعزیت کا اظہار کیا۔

آرمی چیف نے کہا کہ جنگ میں اسرائیلی ڈیفنس فورسز کے ہاتھوں بے گناہ شہریوں پر تشدد اور اندھا دھند ہلاکتوں پر گہری تشویش ہے،شہری آبادی، تعلیمی و امدادی کارکنوں، اسپتالوں پر مسلسل حملے قابل مذمت ہیں،غزہ سے فلسطینیوں کی جبری بے دخلی انسانیت کے خلاف صریح جرائم ہیں۔

آرمی چیف نے 1967ء سے پہلے کی سرحدوں کی بنیاد پر قائم ہونے والی آزاد ریاست فلسطین کے لیے پاکستان کی اصولی
حمایت کا اعادہ کیا اور کہا کہ فلسطین کا دارالحکومت القدس الشریف ہے، غزہ میں تشدد کی تازہ لہر جبر، انسانی حقوق کی مسلسل خلاف ورزیوں اور ریاستی سرپرستی میں مسجد اقصیٰ کی بے حرمتی کا نتیجہ ہے،اس جنگ کو دہشت گردی سے جوڑنا نادانی ہوگی۔

آرمی چیف نے کہا کہ اس نازک موڑ پر یہ ضروری ہے کہ بین الاقوامی برادری اسرائیلی ڈیفنس فورسز کی طرف سے طاقت
کے غیر متناسب اور غیر قانونی استعمال کی وجہ سے رونما ہونے والے انسانی المیے کو جلد از جلد ختم کرنے
کے لیے متحرک ہو، انسانی حقوق کی ان صریح خلاف ورزی میں مظالم کو جاری رکھنے کی حوصلہ افزائی کرنے سے باز رہے۔

دفاعی ماہرین کا کہنا ہے کہ آرمی چیف نے عالمی برداری پرزور دیا ہے کہ اسرائیل کو بین الاقوامی قوانین پر عملدرامد
کا پابند بنائے فلسطین پر اسرائیلی بربریت کے بعد پاکستان میں تعینات فلسطینی سفیر کی
آرمی چیف سے پہلی ملاقات ہے۔