راولپنڈی اور اسلام آباد میں پی ٹی آئی رہنماؤں کے ناقابل ضمانت وارنٹ جاری

خلیج اردو
راولپنڈی/اسلام آباد
راولپنڈی کی انسداد دہشت گردی عدالت نے مسلسل عدم پیشی پر بانی پی ٹی آئی کی ہمشیرہ علیمہ خان کے دوبارہ ناقابل ضمانت وارنٹ جاری کر دیے۔ علیمہ خان سمیت 11 ملزمان کے خلاف 26 نومبر کے احتجاج پر درج مقدمات کی سماعت میں علیمہ خان کے علاوہ دیگر 10 ملزمان عدالت میں پیش ہوئے، جبکہ استغاثہ کے 5 گواہان بھی مالِ مقدمہ کے ساتھ عدالت میں موجود تھے۔

عدالت نے علیمہ خان کے ضامن عمر شریف کے بھی ناقابل ضمانت وارنٹ گرفتاری جاری کیے اور پولیس کو ہدایت دی کہ علیمہ خان کو گرفتار کر کے 22 اکتوبر کو پیش کریں، ساتھ ہی ضامن کی جائیداد کی دستاویزات کی تصدیق کے لیے ڈی سی راولپنڈی کو ہدایات جاری کی گئیں۔ اسی دوران انسداد دہشت گردی عدالت اسلام آباد نے سنگجانی جلسے کے دوران درج مقدمات پر عمر ایوب، زین قریشی، زرتاج گل اور علی بخاری کے ناقابل ضمانت وارنٹ جاری کر دیے اور پی ٹی آئی رہنماؤں کو گرفتار کر کے پیش کرنے کا حکم دیا۔ سماعت 23 اکتوبر تک ملتوی ہوئی جبکہ شیر افضل مروت کی درخواست پر نوٹسز جاری اور دلائل طلب کیے گئے۔

تمام ملزمان کے خلاف کارروائی جاری ہے اور عدالت نے قانون کے مطابق گرفتاری اور پیشی کے احکامات جاری کیے ہیں۔