خلیج اردو – وزیراعظم پاکستان کے دفتر سے جاری ہونے والے بیان میں کہا گیا ہے کہ سٹیٹ بنک ملک کے آٹھ بڑے بینکوں کے تعاون سے روشن ڈیجیٹل اکاؤنٹ متعارف کرا رہا ہے۔
روشن ڈیجیٹل اکاؤنٹ ستمبر کے پہلے ہفتے میں متعارف کرایا جائے گا جس کی بدولت بیرون ملک مقیم پاکستانی گھر بیٹھے ملک کے کسی بھی بینک میں باآسانی اپنا اکاؤنٹ کھول سکیں گےڈیجیٹل اکاؤنٹ کی بدولت ترسیلات زر، بلوں کی ادائیگی اور سرمایہ کاری سمیت مختلف سہولیات باآسانی میسر آئیں گی۔
جمعرات کے دن وزیراعظم عمران خان کی زیر صدارت اجلاس میں روشن ڈیجیٹل اکاؤنٹ اور اس کے تحت میسر آنے والی سہولتوں پر بریفنگ دی گئی۔
وزیراعظم نے بیرون ملک مقیم پاکستانیوں کی سہولت کاری کے لیے متعارف کرائے جانے والے روشن ڈیجیٹل اکاؤنٹ کے حوالے سے گورنر سٹیٹ بنک اور اشتراک کرنے والے نجی بینکوں کی کاوشوں کی تعریف کی اور کہا کہ بیرون ملک مقیم پاکستانی ملک کا سب سے قیمتی اثاثہ ہیں۔
