شاہد آفریدی کا انکشاف: "چیئرمین پی سی بی محسن نقوی نے کہا کہ انہیں کرکٹ کے بارے میں کچھ معلوم نہیں”

خلیج اردو
اسلام آباد:پاکستان کرکٹ ٹیم کے سابق کپتان شاہد آفریدی نے انکشاف کیا ہے کہ پاکستان کرکٹ بورڈ (پی سی بی) کے چیئرمین محسن نقوی نے خود کہا کہ انہیں کرکٹ کے بارے میں کچھ معلوم نہیں۔

ایک ٹی وی پروگرام میں بات کرتے ہوئے شاہد آفریدی نے کہا کہ محسن نقوی ایسے بیوروکریٹس کے ساتھ کام کر رہے ہیں جن کا کرکٹ سے کوئی تعلق نہیں۔

انہوں نے کہا: "میں لاہور میں چیئرمین صاحب سے ملا۔ گراونڈز اور قذافی اسٹیڈیم میں جو کام ہوا ہے، وہ واقعی بہت اچھا ہے۔ وہ مزید کام کرنا چاہتے ہیں، لیکن انہوں نے خود کہا کہ انہیں کرکٹ کے بارے میں کچھ معلوم نہیں۔ اگر آپ کو کرکٹ کا علم نہیں تو آپ کو ایسے ماہرین کے ساتھ کام کرنا چاہیے جو کھیل کو سمجھتے ہوں۔”

شاہد آفریدی نے انتخابی کمیٹی اور دیگر عہدوں پر موجود افراد پر بھی سوال اٹھاتے ہوئے کہا کہ سلیکشن کمیٹی میں بیٹھے افراد بیوروکریٹس ہیں جن کا کرکٹ سے کوئی تعلق نہیں۔

انہوں نے پاکستان کرکٹ کی ناکامی کی وجہ کمزور ڈومیسٹک کرکٹ نظام کو قرار دیا اور کہا کہ اگر بنیادی ڈھانچہ مضبوط ہوگا تو قومی ٹیم کے نتائج خود بہتر ہو جائیں گے۔

محسن نقوی، جو پنجاب کے سابق نگراں وزیر اعلیٰ رہ چکے ہیں، نے گزشتہ سال پاکستان کرکٹ بورڈ کے چیئرمین کا عہدہ سنبھالا تھا اور وہ 11 مارچ 2024 سے پاکستان کے وفاقی وزیر داخلہ بھی ہیں۔