خلیج اردو
سیول: جنوبی کوریا کی ٹیکنالوجی کمپنی سام سنگ الیکٹرانکس نے جمعرات کو اعلان کیا کہ رواں مالی سال کی تیسری سہ ماہی میں اس کا آپریٹنگ منافع 32 فیصد بڑھ کر 12.2 کھرب وون (8.5 ارب ڈالر) تک پہنچ گیا ہے۔ کمپنی کا کہنا ہے کہ یہ اضافہ میموری چپ بزنس میں ریکارڈ فروخت اور مصنوعی ذہانت (اے آئی) سے منسلک عالمی طلب میں اضافے کے باعث ہوا۔
سام سنگ اور ایس کے ہائنکس، جو دنیا کی سب سے بڑی میموری چپ ساز کمپنیوں میں شامل ہیں، اے آئی ٹیکنالوجی کے فروغ سے بڑے پیمانے پر فائدہ اٹھا رہی ہیں، کیونکہ ان کی مصنوعات اے آئی انفراسٹرکچر کے لیے بنیادی اہمیت رکھتی ہیں۔
کمپنی کے مالیاتی بیان میں کہا گیا کہ ڈیوائس سلوشنز ڈویژن کی فروخت سہ ماہی کے لحاظ سے 19 فیصد بڑھ گئی، جب کہ میموری بزنس نے اپنی تاریخ کی بلند ترین سہ ماہی فروخت ریکارڈ کی۔
اسمارٹ فون ڈویژن نے بھی سہ ماہی بنیاد پر 11 فیصد آمدنی میں اضافہ ظاہر کیا، جس کی وجہ نئے فولڈایبل فونز کی کامیاب لانچنگ اور فلیگ شپ ماڈلز کی مضبوط فروخت بتائی گئی۔
سام سنگ نے توقع ظاہر کی ہے کہ چوتھی سہ ماہی میں اے آئی انڈسٹری کی تیز رفتار ترقی اس کے چپ اور اسمارٹ فون یونٹس (ڈی ایس اور ڈی ایکس ڈویژنز) کے لیے نئی مارکیٹ کے مواقع پیدا کرے گی۔
اے آئی بوم نے نہ صرف ہائی بینڈوڈتھ میموری (ایچ بی ایم) چپس کی طلب میں نمایاں اضافہ کیا ہے بلکہ روایتی نینڈ اور ڈیرام میموری کی قیمتوں اور ترسیلات کو بھی اوپر لے گیا ہے۔
