خلیج اردو
امریکی سینٹرل کمانڈ کے سربراہ ایڈمرل بریڈ کوپر نے حالیہ دورے کے دوران یو ایس ایس ابراہم لنکن کے عملے کی کارکردگی کو سراہتے ہوئے کہا ہے کہ امریکی بحریہ کے 11 فعال طیارہ بردار جہازوں میں اس جہاز پر ذہنی صحت کے مسائل کے سب سے کم کیسز رپورٹ ہوئے ہیں۔
ایڈمرل کوپر نے جہاز کی قیادت کو ذہنی صحت اور عملے کی ذہنی مضبوطی کو ترجیح دینے پر خراجِ تحسین پیش کیا، تاہم انہوں نے تسلیم کیا کہ طویل عرصے تک سمندر میں خدمات انجام دینا ہر فرد کے لیے آسان نہیں ہوتا۔
یہ بیان ایسے وقت میں سامنے آیا ہے جب یو ایس ایس ابراہم لنکن پر خراب حالات اور عملے کی ذہنی صحت سے متعلق خدشات کی اطلاعات سامنے آ رہی ہیں۔
امریکی قانون سازوں کے مطابق یہ طیارہ بردار جہاز 200 روز سے زائد عرصے سے کسی بندرگاہ پر نہیں رکا، جو جدید دور میں مسلسل سمندر میں رہنے کا ایک نیا ریکارڈ ہے۔ ارکانِ کانگریس نے جہاز پر تعینات اہلکاروں کے اہلِ خانہ کی شکایات کے بعد اس معاملے کی وضاحت کا مطالبہ کیا ہے۔
یو ایس ایس ابراہم لنکن گزشتہ سال نومبر میں سان ڈیاگو سے روانہ ہوا تھا، تاہم بعد میں ایران کے ساتھ جنگ کے دوران امریکی فوجی کارروائیوں کی حمایت کے لیے اسے مشرقِ وسطیٰ بھیج دیا گیا۔ اس وقت جہاز پر تقریباً 5 ہزار امریکی بحری اہلکار اور میرینز موجود ہیں۔
دوسری جانب امریکی صدر ڈونلڈ ٹرمپ نے جہاز پر طویل تعیناتی کے حوالے سے خدشات کو مسترد کرتے ہوئے کہا کہ یہ تعیناتی ضرورت سے زیادہ طویل نہیں ہوئی۔
ٹرمپ نے صحافیوں سے گفتگو کرتے ہوئے کہا کہ یہ جہاز اس وقت بھی اپنے مشن پر کام کر رہا ہے یا جلد ہی واپس روانہ ہوگا، جبکہ اس کی جگہ ایک اور اسی نوعیت کا طیارہ بردار جہاز تعینات کیا جائے گا۔
