پاکستانی ہمارے معاشرے کا اہم حصہ، ویزا پابندی پر تاحال کوئی فیصلہ نہیں ہوا: امریکی وزارت خارجہ

خلیج اردو
واشنگٹن: امریکی وزارت خارجہ کی ترجمان مارگریٹ میکلاؤڈ نے کہا ہے کہ پاکستانی امریکا میں بسنے والے معاشرے کا اہم حصہ ہیں اور پاکستانی شہریوں کے امریکا میں داخلے پر پابندی کے بارے میں تاحال کوئی فیصلہ نہیں ہوا۔

ترجمان کے مطابق صدر ڈونلڈ ٹرمپ نے 20 جنوری کو ایک صدارتی حکم نامہ جاری کیا ہے، جس کے تحت ویزا پروگرام پر ازسرنو نظرثانی کی جائے گی۔ اس فیصلے کا مقصد امریکا کو غیر ملکی دہشت گردوں سے محفوظ رکھنا ہے۔

مارگریٹ میکلاؤڈ نے مزید کہا کہ ویزا پابندیوں کے لیے مختلف ممالک سے متعلق معلومات کا تبادلہ کیا جا رہا ہے۔ انہوں نے یاد دلایا کہ صدر ٹرمپ نے اسٹیٹ آف دی یونین خطاب میں پاکستان کے تعاون کو سراہا تھا۔

ترجمان نے کہا کہ امریکا میں داخلے کے لیے درخواست دینے والے کو تمام معلومات درست فراہم کرنی چاہئیں، جبکہ غیر قانونی طور پر امریکا میں داخل ہونے کی صورت میں سزا کا سامنا کرنا پڑے گا۔