خلیج اردو
امریکا نے جاری جنگ کے دوران بڑا دعویٰ کرتے ہوئے کہا ہے کہ تین ہفتوں میں ایران کے 8 ہزار سے زائد اہداف کو کامیابی سے نشانہ بنایا گیا ہے، جبکہ 130 طیاروں کو بھی تباہ کیا گیا۔ امریکا کے اس دعوے نے خطے میں جاری کشیدگی کو مزید نمایاں کر دیا ہے۔
غیر ملکی میڈیا رپورٹس کے مطابق امریکی بحریہ کے اعلیٰ عہدیدار ایڈمرل کوپر نے کہا کہ امریکی فوج نے ایران سے متعلق ہزاروں عسکری اہداف کو نشانہ بنایا، جسے ایک بڑی فوجی کامیابی قرار دیا جا رہا ہے۔
ایڈمرل کوپر کے مطابق یہ کارروائی دوسری جنگِ عظیم کے بعد مختصر مدت میں بحری طاقت کے خلاف سب سے بڑی مہم ہے، جس میں جدید ہتھیاروں اور مربوط حکمت عملی کا استعمال کیا گیا۔
تجزیہ کاروں کا کہنا ہے کہ ایسے دعوے جنگی صورتحال کی شدت کو ظاہر کرتے ہیں، تاہم ان کی آزادانہ تصدیق مشکل ہوتی ہے، اور یہ بیانات اکثر نفسیاتی اور سفارتی دباؤ بڑھانے کیلئے بھی دیے جاتے ہیں۔
