پاکستانی خبریں

سابقہ حکمرانوں کی پالیسیوں سے امیروں کو نوازا گیا ، حکمرانوں نے لندن کے پوش علاقوں میں جائیدادیں بنائیں

خلیج اردو
28 اپریل 2021
کوئٹہ : پاکستان کے وزیراعظم عمران نے کہا ہے کہ ملک میں ایک طبقہ امیر ہوگیا ہے اور باقی غریب رہ گئے۔ ہمارے سابقہ حکمرانوں نے لندن کے امیر ترین علاقوں میں جائیدادیں بنائیں۔ یہ ان علاقوں میں محلات بنا چکے ہیں جہاں برطانیہ کا وزیراعظم بھی جائیداد نہیں خرید سکتا۔ ان حکمران کا مائنڈ سیٹ ہی نہیں تھا کہ بلوچستان کو بھی ترقی دینی ہے۔

کوئٹہ میں شاہراہوں کی سنگ بنیاد کی تقریب سے وزیراعظم عمران خان نے خطاب کرتے ہوئے کہا کہ ہم نے بلوچستان میں منصوبوں کا آغاز کیا ہے۔ بلوچستان میں ترقیاتی منصوبے شروع کرنے پر کافی خوشی ہے۔ کامیابی اور عزت اللہ کے ہاتھ میں ہے اور وہ جس کو عزت دیتا ہے جو اس کی مخلوق کیلئے کام کرتا ہے۔ اگر ہم دیکھیں تو غیر مسلم گنگا رام نے جب لاہور میں اسپتال بنایا تو لوگوں نے ان کی تعریف کی۔

ان کا کہنا تھا کہ خیبرپختونخوا میں حکومت سنبھالی تو صوبے کو دہشتگردی کا سامنا تھا۔ ہمارے مخالفین کہتےتھے کدھر ہے نیا پاکستان کہاں ہے ۔ پھر ایک سیاسی دوست نے مشورہ دیا پنجاب پر توجہ دیں کیونکہ خیبرپختونخوا میں جیت کا چانس نہیں ۔ پھر دیکھا کہ 2018 کے انتخابات میں خیبرپختونخوا سے دو تہائی اکثریت ملی۔ خیبرپختونخوا میں انسانی ترقی پر سب سے زیادہ سرمایہ کاری کی گئی۔

وزیر اعظم عمران خان نے کہا کہ تمام صوبوں کو ہیلتھ انشورنس دے رہے ہیں۔ ہیلتھ کارڈ کے ذریعے کسی بھی اسپتال سے علاج کرایا جاسکتا ہے۔ جن صوبوں میں پی ٹی آئی حکومت ہے وہاں شہریوں کو صحت کارڈ دے رہے ہیں۔ بلوچستان میں بھی ہر خاندان کو صحت انصاف کارڈ فراہم کریں گے۔ پنجاب میں کسان کارڈ کیلئے رجسٹریشن شروع کر دی گئی ہے اور کسانوں کو کسان کارڈ کے تحت براہ راست سبسڈی دیں گے۔

عمران خان نے مزید کہا کہ ریاست مدینہ کے سربراہ مہنگے محلات میں نہیں رہا کرتے تھے اور نہ ہی مہنگے کپڑے نہیں بناتے تھے۔ وہاں پیسہ عوام پر خرچ ہوتا تھا۔ انہون نے کہا کہ پاکستان کا مغربی روٹ بھی ترقی میں پیچھے رہ گیا کیونکہ سابقہ حکمرانوں نے ماضی میں مغربی روٹ کو نظرانداز کیا۔

 

متعلقہ مضامین / خبریں

Back to top button