پی ٹی آئی کو بلے کا نشان واپس ملے گا ؟ پارٹی نے بڑا فیصلہ کر لیا

خلیج اردو
اسلام آباد: پاکستان تحریک انصاف کے انٹراپارٹی انتخابات کا باضابطہ شیڈول جاری۔ یکم فروری کو کاغذات نامزدگی حاصل، اگلے روز جمع، تین فروری کو اسکروٹنی، چار فروری کو فہرست اور انٹراپارٹی انتخابات 5 فروری کو ہونگے۔

تحریک انصاف کے فیڈرل الیکشن کمشنر رؤف حسن کی جانب سے انٹرا پارٹی انتخابات کا شیڈیول جاری کیا گیا۔ تمام رجسٹرد ممبران اپنی مرضی کے پینل یا چیئرمین کے امیدوار کے حق میں پاکستان بھر میں مختص مقامات پر ووٹ ڈال سکیں گے۔ پارٹی ممبران اپنا ووٹ رابطہ ایپلیکیشن، انٹرا پارٹی الیکشن ماڈیول کے ذریعے بھی ریکارڈ کرا سکتے ہیں۔31 جنوری 2024 تک رجسٹر تمام ممبران کو ووٹ ڈالنے کی اجازت ہو گی۔

کاغذات نامزدگی 2 فروری تک تحریک انصاف کے مرکزی سیکرٹریٹ یا ویب سائٹ سے حاصل کیے جاسکیں گے۔ کل رات دس بجے تک کاغذات نامزدگی جمع کروانے کی آخری تاریخ ہوگی۔ امیدوار اپنے کاغذات نامزدگی مرکزی اور صوبائی سیکرٹریٹس اور ڈیجیٹلی بذریعہ ای میل بھی جمع کرا سکیں گے۔ سکروٹنی کا عمل 3 فروری کو ہو گا۔ اعتراضات جمع کروانے کا وقت 3 فروری رات 10 بجے تک ہوگا۔

تمام حتمی پینلز کی فہرستیں 4 فروری کی شام 4 بجے شائع کی جائیں گی۔ پولنگ کا وقت پیر صبح 10 بجے سے شام 4 بجے تک ہو گا۔ انٹرا پارٹی الیکشن میں حصہ لینے والے تمام پینلز کی تفصیل تحریک انصاف کی آفیشل ویب سائٹ اور رابطہ
ایپلیکیشن پر دستیاب ہو گی۔ انٹرا پارٹی الیکشن کے نتائج کا باضابطہ اعلان 6 فروری کو کیا جائے گا۔۔

الیکشن کے مقامات اور اپیلٹ ٹربیونل کی تاریخ کا اعلان یکم فروری کو کیا جائے گا۔