خلیج اردو
دبئی: دبئی حکومت نے اسلامی سال 1447 ہجری کے آغاز پر جمعہ، 27 جون کو سرکاری تعطیل کا اعلان کر دیا ہے۔ یہ تعطیل صرف سرکاری اداروں، محکموں اور سرکاری ملازمین کے لیے ہوگی، جس کے نتیجے میں تین روزہ ویک اینڈ حاصل ہوگا۔ معمول کے دفتری اوقات کار پیر، 30 جون سے بحال ہوں گے۔
تاہم وہ سرکاری ادارے جہاں ملازمین شفٹوں میں کام کرتے ہیں یا جہاں عوامی خدمات اور اہم سہولیات کی فراہمی کو یقینی بنانا ضروری ہے، ان کے لیے الگ اوقات کار مقرر کیے جا سکتے ہیں تاکہ خدمات میں کوئی خلل نہ آئے۔
قبل ازیں متحدہ عرب امارات کی وفاقی حکومت کی جانب سے بھی 27 جون کو اسلامی نئے سال کے موقع پر عام تعطیل کا اعلان کیا گیا تھا، جس کا اطلاق وفاقی محکموں اور سرکاری ملازمین پر ہوتا ہے۔
اسی طرح نجی شعبے کے ملازمین کو بھی جمعہ، 27 جون کو اسلامی نئے سال کی مناسبت سے تنخواہ کے ساتھ تعطیل دی جائے گی۔
یاد رہے کہ اسلامی یا ہجری کیلنڈر قمری مہینوں پر مبنی ہے اور نیا سال محرم کی پہلی تاریخ سے شروع ہوتا ہے۔ اس تعطیل کی تاریخ متحدہ عرب امارات کی کابینہ کی جانب سے جاری کردہ 2025 کے سرکاری تعطیلات کے شیڈول کے مطابق طے کی گئی ہے۔
یہ تعطیل عیدالاضحیٰ کی طویل چھٹیوں کے بعد یو اے ای میں بسنے والوں کے لیے ایک اور موقع فراہم کرے گی کہ وہ تین دن سکون سے گزار سکیں۔
