غزہ میں شدید سردی اور بارشوں سے اموات میں اضافہ، عالمی تشویش میں اضافہ

خلیج اردو
غزہ: 19 دسمبر 2025۔ غزہ میں شدید سردی اور موسلا دھار بارشوں کے باعث جاں بحق افراد کی تعداد بڑھ کر 17 ہو گئی ہے، جن میں چار بچے بھی شامل ہیں۔ رہائش اور ایندھن کی شدید قلت کے باعث بچوں اور بزرگوں کی زندگیاں شدید خطرات سے دوچار ہیں، جبکہ عارضی پناہ گاہوں میں موجود خاندان سرد موسم کا مقابلہ کرنے سے قاصر نظر آ رہے ہیں۔

عالمی اداروں نے غزہ میں بگڑتی انسانی صورتحال پر گہری تشویش کا اظہار کرتے ہوئے فوری امداد کی ضرورت پر زور دیا ہے۔ قطری وزیراعظم نے غزہ کے لیے انسانی امداد میں اضافے کا مطالبہ کرتے ہوئے خبردار کیا ہے کہ اگر صورتحال کو فوری طور پر نہ سنبھالا گیا تو جنگ بندی بھی خطرے میں پڑ سکتی ہے۔

دوسری جانب، غزہ میں جاری کارروائیوں کے تناظر میں نسل کشی میں شریک ایک اور اسرائیلی فوجی نے خودکشی کر لی ہے، جس کے بعد گزشتہ دو برسوں کے دوران خودکشی کرنے والے اسرائیلی فوجیوں کی تعداد 61 ہو گئی ہے۔ مبصرین کے مطابق یہ واقعات جنگ کے نفسیاتی اثرات کی سنگینی کو بھی ظاہر کرتے ہیں۔