خلیج اردو
برطانیہ سے شائع ہونے والے معروف کرکٹ سالنامہ "وزڈن کرکٹرز المانک” نے عالمی کرکٹ پر بڑھتے ہوئے بھارتی اثر و رسوخ کو خطرناک قرار دے دیا ہے۔
سالنامہ کے ایڈیٹر لارینس بوتھ نے اپنی رپورٹ میں کہا ہے کہ عالمی کرکٹ کی گورننس تیزی سے "آرویلین” شکل اختیار کر رہی ہے، جہاں ایک ملک کا غلبہ کھیل کے توازن کو متاثر کر رہا ہے۔
رپورٹ میں دعویٰ کیا گیا ہے کہ بھارتی کرکٹ بورڈ اب محض ایک کھیلوں کا ادارہ نہیں رہا بلکہ حکمران جماعت بھارتی جنتا پارٹی کا "اسپورٹس بازو” بن چکا ہے، جو کھیل کو سیاسی مقاصد کے لیے استعمال کر رہا ہے۔
وزڈن کے مطابق انٹرنیشنل کرکٹ کونسل میں بھی بھارتی اثر و رسوخ نمایاں ہے، جہاں چیئرمین جے شاہ اور چیف ایگزیکٹو سنجوگ گپتا دونوں بھارت سے تعلق رکھتے ہیں، جس سے عالمی کرکٹ کی غیر جانبداری پر سوالات اٹھ رہے ہیں۔
رپورٹ میں اس بات پر زور دیا گیا ہے کہ عالمی کرکٹ کے شفاف اور متوازن مستقبل کے لیے گورننس کے اصولوں کو مضبوط اور سیاسی اثرات سے آزاد رکھنا ناگزیر ہے۔
یہ تجزیہ عالمی کھیلوں میں طاقت کے بڑھتے ہوئے عدم توازن اور اس کے ممکنہ اثرات پر ایک اہم بحث کو جنم دے رہا ہے۔
